Kandidatu PR Francisco Guterres “Lú-olo” Garantia Vitoria Iha Eleisaun Segunda ronda

Jornal Timor Post
 Tersa, 03 Abril 2012

“Lú-Olo Garantia Vitoria”

Kandidatu Prezidenti Republika (KAPREZ), Francisco Guterres “Lú-olo” garante nia sei hetan duni vitoria iha eleisaun segunda ronda ne’e, tanba nia fiar katak, ho apoiu ne’ebe nia hetan iha primeira ronda sei aumenta maka’as tebes.

Lú-Olo hateten lia hirak ne’e wainhira ba hala’o kampaña segunda ronda iha Sub-Distritu Atsabe, Distritu Ermera, Segunda (02/04).

Lú-Olo iha nia kampaña promete sei hadia servisu tomak ne’ebe durante ne’e failha, no nia apela ba militantes, simpatizantes no apoiantes atu labele tauk ho rumoris, nune’e ba vota iha eleisaun mai.

“Husu ba povu labele tauk, eleisaun agora ita hotu sei respeita, FRETILIN manan, FRETILIN sei garantia moris diak ba povu hotu,” hateten Lú-Olo.

Nia promete, wainhira nia eleitu duni ba Prezidenti Republika maka nia sei tau matan nafatin osan ba veteranus, hadia estrada, tanba durante tinan 4 nia laran, tuir nia osan barak mak fakar maibe laiha rejultadu diak ba povu nia moris.

Iha fatin hanesan, Sekretariu Jeral FRETILIN Mari Alaktiri hateten, nia fiar wainhira Lú-Olo manan sei uza nia kompetensia hodi servisu hamutuk ho Governu hodi koalia kona ba problema hotu ne’ebe mak sai preokupasaun bo’ot liu husi Povu.

Alkatiri hatutan, durante ne’e Governu gasta osan povu nian barak mak saugate de’it tamba laiha benefisiu ba povu.

Tuir observasaun Timor Post iha terenu nota katak, kampania ne’ebe hahu tuku 2 lokraik ne’e, hetan partisipasaun masimu husi militante FRETILIN no apoiante sira husi Bloku Proklamador, ASDT, UNDERTIM no seluk tan, tuir orariu ba kampania kandidatu no numero sorteiro 1 ne’e, tuir mai sei hala’o iha Suku Lurba, Sub-Distritu Bobonaro, Distrito Bobonaro.