PNTL Identifika Grupu Sobu Sede FRETILIN

Image: endvawnow.org

Jornal Timor Post
Tersa, 27 Marsu 2012


Polisia Nasional Timor-Leste (PNTL), liu husi Komando Distrital Baucau identifika ona grupu ne’ebe sobu sede partidu FRETILIN iha Suku Triloka, Distritu Baucau, no oras ne’e dadaun iha ona prosesu investigasaun.
 
Informasaun ne’e hato’o husi, segundu komodante PNTL Komisariu Afonso de Jesus ba Timor Post, Segunda (26/03), iha Kuartel Jeneral, Kaikoli, Dili.

“Mosu problema iha suku ne’eba, maibe la du’un bo’ot, dala ruma ema desentendimentu halo provokasaun, maibe Polisia identifika ona no tama ona ba iha prosesu investigasaun,” hateten Afonso.

Nia afirma, Komando Nasional nia koperasun ho komando distrital sira la’o diak tebes, no sei kontinua mantein nafatin kooperasaun hodi antisipa kualker problemas iha teritoriu tomak.

“Sira (Komando Distrital) halo hela dadaun prosesu ba ema sira ne’ebe maka atu kria provokasaun, sira ne’e tam ona iha prosesu invetigasaun,” katak Afonso.

Entertantu, segundu komodante PNTL ne’e mos husu ba komunidade tomak atu iha kooperasaun diak ho PNTL, atu nune’e bele hametin liu tan ambiente hakmatek iha rai laran.