Tau Interese Povu Nian A’as. “Deputadu Bloku AMP No Opozisaun Kontinua Ezizi Altera Lei Eleitoral”

Jornal INDEPENDENTE
Tersa, 27 Marsu 2012


Parlamentu Nasional oras ne’e dadaun prepara hela atu halo alterasaun lei eleitoral ba sidadaun hotu hodi ezerse nia funsaun ho masimu.


Tuir dadus eleisaun foin lalais ne’e, husi total eleitoral ne’ebe mak iha kuaze 25 pursentu mak la-tuir eleisaun iha Primeira Volta ba Presidenti Repúblika, periodu 2012-2017.

Situasaun ne’e halo membru Parlamentu Nasional husi Bancada AMP no Opozisaun kontinua kestiaona maka’as hodi ezizi alterasaun ba lei eleitoral hodi eleitor sira bele partisipa ho masimu, mesmu parte CNE nian sujere ona atu labele altera lei.

Presidenti Bankada Partidu Demokrata (PD) ne’ebe hanesan mos membru deputadu Bloku AMP, Adriano do Nascimento hateten, bainhira parlamentu foti desizaun hodi halo alterasaun ba lei refere iha tinan kotuk ho intensaun maka’s hodi evita eleitor ida vota dala rua ka tolu, maibe la espera ba partisipasaun povu nia iha eleisaun jeral.

“Iha tempu ne’ebe ami la konsege analiza ba nia kustu ekonomia politika,” deklara nia.

Tanba ezemplo foin lalais, povu ki’ik ne’ebe buka nia vida iha kapital Dili tenki obriga a’an fila ba foho hodi tuir eleisaun.

Ne’e duni, deputadu husi Bloku AMP ne’e hateten, karik tempu oportunu antes tama ba segunda ronda, lei refere hetan alterasaun atu sidadaun hotu bele vota livre.

Ba kestan hanesan hato’o mos husi Deputadu Bancada FRETILIN, Inacio Moreira hateten, maske STAE no CNE iha razaun barak konaba lei eleitoral refere, maibe presija haree mos realidade iha terenu, liliu partisipasaun povu nia iha eleisaun foin lalais ne’e.

Tanba ne’e deputadu husi bancada FRETILIN ne’e husu, kuandu identifika iha prejuizu ruma iha tempu badak nia laran tenki halo alterasaun ba lei refere atu fo espasu diak ba povu tomak hodi ezerse nia direitu.