PR. Ramos Horta Husu F-FDTL Labele Monu Ba Manobra Politika

Jornal INDEPENDENTE
Tersa, 03 Abril 2012

“Horta Husu F-FDTL Labele Monu Ba Manobra Politika”

Prezidenti Republika Jose Ramos Horta kontinua fo’o atensaun ba F-FDTL no PNTL atu labele monu ba manobra politika, maibe tenki neutru seguransa situasaun hodi povu bele hakmatek.

Horta husu atensaun ne’e, relasiona ho rumoris ema balun uza F-FDTL hodi ameasa povu iha area rural ne’ebe do’ok husi vila.

“Ema balun uza nafatin F-FDTL nia naran ameasa iha ne’e ou iha ne’eba, maske oituan,” dehan Horta hafoin vizita Portu Naval Hera.

Xefe Estadu mos espera katak, iha eleisaun segunda ronda no eleisaun parlamentar ne’ebe mak sei mai tenki lao hakmatek no dame nia laran.

Horta dehan, importante komando F-FDTL fo’o nafatin orden instituisaun makas atu labele iha militar ida sai husi nia kna’ar hodi involve iha atividade politiku no partidu.

Ba kestaun ne’e, Maijor Jeneral Lere Anan Timur no Komodante Komisariu Longuinhos Monteiro antes ne’e husu povu atu labele fiar rumoris, tanba PNTL no F-FDTL sei garante seguransa iha eleisaun segunda ronda, maske F-FDTL la-direitamente halo seguransa.