Prezidenti Parlametu Nasional Deskonfia Governu Halo Subornu

Image: tech-search.net

Jornal INDEPENDENTE
Tersa, 03 Abril 2012


Hafoin foti lista povu kiak iha Timor laran, Governu liu husi Ministeriu Solidaridade Sosial (MSS) distribui fo’os ba povu ki’ik sira, maibe, Prezidenti Parlamentu Nasional no deputadu sira deskonfia, tanba apoiu ne’e hala'o iha tempu eleisaun nian.


Iha fulan kotuk, Xefe familia sira ne’ebe mak hatama ona lista ba xefe suku ne’ebe mak kbi’it laek hetan fo’os saku ida husi MSS ho gratuitu, maibe Politika ne’e Prezidenti Parlamentu Nasional, Deputadu FRETILIN no PD la gosta, tanba hamosu duvida boot.

“Tama kampaña no eleisaun mak foin fahe, ne’e la lo’os, keta money politic hotu karik?,” kestiaona deputada bancada PD, Tereza de Carvalho, liu husi sesaun Plenaria horsehik.

Tuir deputadu ne’e rona katak, bainhira fahe fo’os ne’e, Governu husu ba komunidade atu fo sira nia votu ba eleisaun Prezidenti no Parlamentu Nasional.

“Hau rona informasaun, sira aproveita fahe fo’os ne’e husu ba komunidade atu vota ba nia partidu, ne’e la’os fo’os partidu nian,” lamenta nia.

Deputada PD ne’e konsidera Governu fahe fo’os atu hetan vitus, tanba ne’e nia husu ba Governu, liliu Ministeriu sira atu labele lori interese partidu iha kna’ar Governu nian.

“Fahe fo’os atu hetan votu ne’e la diak, lo-lo’os fo’os ne’e tenki fahe antes,” tenik nia ho lian maka’as.

Iha fatin hanesan, Deputadu husi bankada FRETILIN, Antoninho Bianco hateten, Governu sempre hamosu planu iha situasaun ne’ebe la apropriadu, tanba lolos ne’e fahe iha fulan rua ka tolu antes tama ba kampaña, ne’e politika hotu ne’ebe soe rai rahun ba povu nia matan.

Politika husi Governu fahe fo’os ne’e mos hetan reasaun husi Prezidenti parlamentu Nasional Fernando Lasama de Araujo, tanba politika ne’e realiza iha tempo ne’ebe ema hotu fo’o atensaun ba politika.

“Hau la hatene, tamba saida mak foos ne’e foin fahe, iha tempo kampaña no eleisaun, povu bele hanoin fo ida ne’e atu halo saida, ema bele manipula sasan estadu nian,” hateten Lasama.

Tanba ne’e, Lasama ne’ebe la-tama iha segunda ronda ba eleisaun Prezidenti ne’e, husu ba governu atu realiza nia planu tuir nesesidade ne’ebe povu presiza iha momentu ne’eba.