PR. Ramos Horta Konsidera Portu Hera Grave No Presija Atensaun Imediata

Image: theage.com.au

Jornal INDEPENDENTE
Tersa, 03 Abril 2012

“Horta Konsidera Portu Hera Grave”

Portu Naval Hera ne’ebe mak governu fakar osan tokon lobuk ida oras ne’e hasoru problema boot, tanba hetan ameasa husi mota.
 
Bainhira ba vizita portu Hera, Prezidenti Repúblika, Jose Ramos Horta, konsidera problema ne’e grave, no presiza atensaun imediata hodi rejolve problema ne’e.

“Todan liu, problema bo’ot liu mak Portu Hera, to’o agora seidauk halo desizaun definitive permanante atu muda dalan be’e nian,” dehan nia iha Portu Naval.

Nune’e nia mos konsidera, edifisu foun Komponente Naval mos tarde, tanba tuir lolos konstrusaun remeta iha dezembru 2011, maibe to’o agora seidauk remata, tamba pagamentu tarde.

Xefe estadu mos preokupa tebes ro’o naval ne’ebe mak Governu sosa husi xina ho folin tokon US$ 28 atu fo protesaun ba rikusoin Timor-Leste iha parte Sul, maibe ro’o ne’e labele halo operasaun, tanba kondisaun la permite.

Horta mos dehan, ro’o-ahi hitu(7) ne’ebe maka F-FDTL iha, iha ona nia tempu halo manutensaun, maibe to’o agora seidauk halo manutensaun.

Tuir nia, loloos Governu halo kedas pronto ba manutensaun atu labele gasta osan barak hodi haruka fali ba Surabaya, problema manutensaun bele estraga ro’o-ahi ne’e iha tempu badak, ne’e duni presiza hao desizaun kona ba manutensaun.

Xefe Estadu mos husu ba Governu atu esplika razaun saida mak Portu Hera ho ro’o rua ne’ebe sosa ho folin bo’ot maibe labele halo operasaun.