Deputadu AMP Protesta Governu Gusmao

Jornal INDEPENDENTE
Tersa, 24 Abril 2012

Ró Naval Paradu, Deputadu AMP Protesta Governu AMP
“Carrascalao Sujere Fa’an Ró, SED Taka Ibun”

Ró Komponente Naval, Falintil-Forsa Defesa Timor-Leste (F-FDTL) ne’ebe sosa husi Xina foin lalais ne’e labele halo operasaun tanba a’at fali ona, ne’e duni, Deputadu Mario Carrascalao husu atu fa’an fali ró ne’e, maibe to’o oras ne’e Sekretariu Estadu Defesa sei taka ibun.

Deputadu Mario konfesa katak, ró Naval rua ne’e labele halo operasaun tanba failhansu mosu husi inisiu bainhira sosa ró, tanba lá halo estudo klean kona-ba kondisaun ho tasi mane.

“Ita toma desizaun arbiru de’it,” tenik nia iha uma fukun PN Segunda (23/04).

Eis Vise Primeiru Ministru atual, deputadu husi Bancada PSD ne’e hatutan, eru seluk mak bainhira sosa ró ne’e, asina uluk kontratu mak foin haruka ba PN hodi aprova.

“Komu maioria mak apoiu AMP, ne’e mak simu deit,” dehan Carrascalao.

Tanba ho kondisaun agora ne’e, Deputado Mario sujere atu fa’an deit ró rua ne’e hodi sosa fali tipu ro foun ne’ebe mak bele halo operasaun iha area tasi-mane.

Iha fatin hanesan, Prezidenti Komisaun B Parlamentu Nasional, asuntu Defesa no Seguransa, deputadu Duarte Nunes, husu ba governu atu rejolve problema ne’e, tanba ró rua ne’e sosa atu halo operasaun iha Tasi-mane laos atu para deit.

Tuir nia, ro rua ne’e sosa saugate deit, tanba bainhira halo aprovasaun, deputadu sira la hatene espesifikasaun klaru.

Entertantu, antes ne’e, Maijor Jeneral Lere Anan Timor, husu atu governu sosa ró Naval foun ba F-FDTL, tanba ró rua ne’ebe Governu sosa husi Xina lá augenta halo operasaun iha tasi-mane.