Ministeriu Publiku Akuza MJ Lucia Lobato Ho Kazu Tolu

Image: paginaglobal.blogspot.com

Jornal INDEPENDENTE
Tersa, 24 Abril 2012

MP Akuza Kazu Korupsaun Tolu
“Ohin, Tribunal Dili Julga MJ Lucia”

Tersa-ohin (24/04) Tribunal Distrital Dili hala’o prosesu julgamentu ba Ministra Justica Lucia Brandao Freitas Lobato, ne’ebe hetan akujasaun forte involve iha kazu krime tolu.

Julgamentu ne’e, hala’o relasiona akuzasaun Ministeriu Publiku, ne’ebe deskonfia maka’as lider Partidu Sosial Demokrata ne’e halo krime kona ba manipulasaun re-tenderizasaun ba projeitu konstrusaun edifisiu konservatoriu Rejistu Sivil iha Distritu 8, krimi abuzu de poder, nepotizmu no korupsaun.

Ba kestaun ne’e, Ministra Lucia deklara, prontu ona hodi ba koalia lialos konaba kazu krime tolu ne’e, tuir akuzasaun Ministeriu Publiku nian iha Tribunal.

“Hau pronto ona atu ba hatan iha Tribunal Dili, aban (14/04), hodi defende hau nia a’an no hau kontente atu prosesa lalais hau nia kazu ne’e,” hateten Ministra Justica Lucia Lobato liu husi konferensia imprensa, iha nia Gabinete, Segunda horsehik.

Temporariamente, Primeiru Ministru Xanana Gusmao mak sei assume nia kargu nu’udar Ministru Justica to’o kazu ne’e hetan finalidade iha Tribunal.

“Hau sei ba hatan hanesan sidadaun bai-bain no hau sei la mai servisu, tamba Parlamentu Nasional hasai tiha ona hau nia imunidade,” dehan Lucia.

Tuir informasaun, julgamentu ba kazu ne’e sei hala’o loron hat(4), hahu Tersa no sei remata iha loron 27 Abril, kazu ne’e prezidi husi Juis koletivu Edita Palmira, Paulo Teixeira no Jose Maria Araujo, prokurador nain tolu, mak hanesan Angelinha Saldanha, Jose Ximenes, no Prokurador internasional Jose Landim.