BANCADA FRETILIN HATO'O CONDOLENCIAS BA FAMILIA TOMAK SAUDOSO SR. FRANCISCO XAVIER DO AMARAL

REPÚBLICA DEMOCRÁTICA DE TIMOR-LESTE

PARLAMENTO NACIONAL

BANCADA PARLAMENTAR DE FRETILIN

  

Horiseik loron 5 Marsu 2012 natureza falun ho kaloan no udan rimis tun hodi hamotuk ho nia ema sira iha rai Timor Leste hakruk sudur tuku tun ba rai tanba ema diak ida, povu Maubere nia oan diak ida husik hela ita hotu hodi fila hikas ba Nai Maromak nia Kadunan.

Ema ne mak Francisco Xavier do Amaral, Presidente ASDT/FRETILIN, nebe lori Comite Central FRETILIN nia naran iha loron 28 Novembru 1975 sai proklamador ba Independensia Unilateral hodi hamoris REPÚBLICA DEMOCRÁTICA DE TIMOR-LESTE (RDTL).

Francisco Xavier do Amaral sai nudar primeiru Presidente República Democrática de Timor-Leste, nia lider politiku tradisional ida nebe besik ba povu, nebe iha sentimentu klean ba nia povu rasik, koñesedor diak tebes kultura povu Maubere nian, tanba ne nia konsege halo komunikasaun diak ho linguagem ida fasil I simplis hodi bele mobiliza povu barak iha tempu badak bele halo movimentu ida bo’ot tebes ba kauza ukun rasik an iha ASDT/FRETILIN nia mahon.

Iha tempu difisil I konturbadu istoria povu Maubere nian iha 1975, Francisco Xavier do Amaral simu responsabilidade bo’ot mai iha palku istoria nian lori desizaun Comite Central FRETILIN halo ho selenidade leitura ba Proklamasaun Unilateral Independensia ba rai ida nebe iha tinan 450(atus hat limanolu) moris iha kolonialismu nia okos hodi sai nudar República Democrática de Timor Leste.

Vontade atu servi’i nia povu no nia rain halo Francisco Xavier do Amaral simu knar sai primeiru Presidente ASDT depois FRETILIN, vontade bo’ot atu servi‘ I mos mak halo nia simu responsabilidade sai primeiru Presidente da República nudar Maubere oan ida, no sentimentu atu servi’i mak halo nia sai kandidatu ba PR periodu 2012-2017 to nia i’is kotu, halo nia sai ezemplu bot ida ba ita hotu atu aprende serve.

Atu remata ami nia liafuan ami hakarak hatete katak prosesu istoria sei lao nafatin halao nia knar, iha prosesu ida ne’e ema hanesan Fracisco Xavier do Amaral maski sei la iha ona hamotuk ho ita, nia naran no nia hahalok sei metin nafatin ho ita atu ita hodi lao tuir.