Eleisaun PR Ba segunda Ronda. “Francisco Guterres “Lú-Olo” Hetan Apoiu Barak”

Jornal Timor Post
Kinta, 22 Marsu 2012


Bloku Proklamador, Kuarta (21/02), deklara apoiu KAPREZ Dr. Francisco Guterres “Lú-Olo” hodi kompete ho kandidatu Taur Matan Ruak iha eleisaun segunda ronda, entertantu, Kinta Horsehik, Kandidatu Independente, Maria do Ceu, mos ofisialmente apoiu Lú-Olo.

Bloku Proklamador ne’e mai husi partidu ASDT, PMD, PDRT no PARENTIL, prezensa Bloku Proklamador ne’e konvida husi Sekretariu Jeral FRETILIN, Marí Alkatiri.

Entertantu, Sekretariu Jeral Bloku Proklamador, Arlindo Marcal, hateten ona para hamutuk hodi lao ba oin ho nune’e bele kompete ho kandidatu seluk.

“Ami Bloku fo apoiu ba Lú-Olo tanba proklamador Xavier hanesan Primeiru Prezidenti partidu FRETILIN, ida ne’e oportunidade para lori fali memoria proklamador Xavier mai fali nia fatin, maske nia laiha ona iha ita nia le’et,” nia esplika.

Aliende ne’e, Portavoz Bloku Proklamador Hermengildo Lopes “Kupa” ne’ebe hanesan Prezidenti Partidu Milenium Dezenvolvimentu (PMD) hateten, sira fo’o apoiu Lu-Olo tamba, Lu-Olo sei sai Prezidenti ba Povu tomak.

“Maske Lú-Olo husi kandidatu FRETILIN maibe wainhira nia halo kampaña, iha nia diskursu hateten, nia sei sai Prezidenti Ba Povu Tomak no Kandidatu Nasional, tanba ne’e, ami hanesan forsa politika fiar katak, Kandidatu Lú-Olo iha potensia atu lori nasaun no reprejetante ba povu tomak,” Kupa dehan.

Nia haklaken, Bloku Proklamador sei organiza Konferensia Nasional ida para kandidatu potensial Lú-Olo ba’a para fo esplikasaun detailhu, kona ba planu, programa, no vizaun ba Prezidenti Repúblika.

Iha biban ne’e, Bloku Proklamador husu ba apoiante no militantes tomak iha 13 atu apoiu ba kandidatu Lú-Olo.

Tuir informasaun katak, kandidatu sira ne’ebe mak apoiu Lú-Olo iha eleisaun segundu ronda mak hanesan, Rogerio Tiago Lobato, Dr. Lucas da Costa, Dr, Manuel Tilman, Partidu KHUNTO no kandidatu Independente, Maria Do Ceu.