Lu-Olo Simu Medalla Meritu, “Rekoinesementu Ba Lideransa FRETILIN Sai Ezemplu Ba Lideransa Sira Seluk Hodi Hakat Tuir”

Jornal Timor Post
Kuarta-feira, 29 Fevereiru 2012

Lu-Olo Simu Medalla Meritu, 

“Rekoinesementu Ba Lideransa FRETILIN Sai Ezemplu Ba Lideransa Sira Seluk Hodi Hakat Tuir”

Prezidenti Republika (PR) Jose Ramos Horta oferese Medalla Meritu Ordem Timor-Leste ba Eis Prezidenti Parlamentu Nasional, Dr. Francisco Guterres Lu-Olo.

Prezidenti la’o foin primeira ves intrega medalla meritu ba Lu-Olo maibe iha tinan 2009, liu-liu nia intrega uluk ona ba sidadaun nasional no internasional maibe ninia kualidade la hanesan.

“Kondekorasaun ne’e aas liu entidades bara-barak husi internasional no nasional ne’ebe maka simu, Medalla Meritu hau fo tamba nia kriteriu ema ne’ebe mak kontribui ba dame no estabilidade nasional no estranjeirus,” PR Horta hateten ba Jornalista sira iha Palasiu Prezidenti, Tersa (28/02), hafoin oferese Medalal Meritu.

Nia dehan, medalla ne’e relevante tebes tamba uniku ema gerileiru ida maka hetan susesu ho notas diak tebes iha universidade, maske nia otas avansa dadauk ona.

“Ema ida Lu-Olo ita bele hateten, katuas oituan ona no tinan 24 iha ailaran no Prezidenti parlamentu, mai husi familia ne’ebe ki’ik, ain tanan, maibe kontinua fila ba universidade hodi estuda no hetan susesu,” Horta tenik.

Xefe estadu husu ba joven foin sa’e sira atu estuda maka’as tamba atu hetan Medalla Meritu ne’e tenki ema ne’ebe matenek no susesu iha nia servisu.