Povu Atabae Du'un Gil Alves La-seriu

Image: odanmatan.blogspot.com

Jornal Timor Post 
Sesta-feira, 02 Marsu 2012

“Povu Atabae Du'un Gil Alves La-seriu”

Maske distribui ona fos ho marka MTCI ba distritu 12 ho folin baratu laiha benefisiu ba povu iha distritu, tanba povu iha Ataba’e du'un Ministru Comersiu no Industria (MTCI), Gil Alves, la seriu atu haree asuntu ne’e.

Realidade ne’e, akontese iha sucu Aidaba Leten, Sub Distritu Ataba’e, tuir autoridade lokal sira katak, fos ne’ebe distribui husi MTCI ba distriu fa'an deit ba loja no kios, komunidade kiik sira la hetan.

“Fos MTCI mai dala rua, maibe sira fa’an deit ba Loja no kios ne’ebe iha osan, depois loja sira fa’an fali ho presu U$14,” informa Xefe Suku Aidaba leten, sub-distritu Atabae, Alberto, Fontes ba Timor Post foin lalais.

Nia dehan, populasaun iha sub Distritu Atabae presiza tebes fos, tamba hare ba iha tinan ne’e menus ai han,” hanesan autoridade lokal, ami konsidera MTCI bosok Povu,” dehan nia.

Nune’e mos, Administrador Distritu Bobonaro Domingos Martins rekoinese, fos MTCI mai duni dala rua, maibe maioria povu iha area Bobonaro barak maka la hetan.

“Atu fasilita povu iha baze hodi asesu fos MTCI, ami husu ba MTCI tenki halo kontrolu, laos distribui tiha fos husi hela deit,” katak nia.

Antes ne’e, tuir programa Ministru Turismu Comersiu Industria Gil Alves hateten, intensaun distribui fos MTCI ba 12 Distritu atu fasilita povu sira hodi hetan folin baratu.