Povu Husu PR Eleitu Tau Matan Ba Povu Ki'ik, Juventude No Defisiente Sira

Jornal Timor Post
Tersa-feira, 17 Abril 2012

“Prezidenti Eleitu Tenki Tau Matan Ba Povu Ki’ik Nia Moris”

Jasinta Viegas ho idade 60 Populasaun suku Motael husu ba Kandidatu Prezidenti ne’ebe eleitu hodi tau matan ba povu nia moris tuir promesas ne’ebe fo sai iha kampaña durante ne’e.

“Hau mai vota tamba atu hili ita nia Prezidenti Timor, tanba ne’e hau husu ba prezidenti ne’ebe eleitu atu tau matan ba ferik no katuas sira ne’ebe la-iha ona kbi’it atu sustenta sira nia moris,” haktuir nia.

Nune’e mos, Arminda Soares da Cruz ho ida 23, juventude Suku Bairo-Pite hateten,” hau husu ba Kandidatu Prezidenti ne’ebe sai eleitu ba Prezidenti RDTL atu tau matan ba joventude nia moris, tamba joventude barak mak seidauk hetan servisu,” haktuir nia.

Nia mos hateten katak, nasaun la-bele ba oin no konflitu mosu iha fat-fatin tanba joventude barak mak seidauk servisu, tanba ne’e nia husu kandidatu ne’ebe eleitu sai Prezidenti atu tau matan ba joventude.

Ba kestaun ne’e mos, Tomas da Silva, Populasaun Suku Comoro, nudar defisiente hateten katak,” hau nia lia-menon ba Prezidenti ne’ebe eleitu, tenki tau matan bá ami defisiente hanesan mos ema ne’ebe normal, tanba maske ami liman tohar, ain a’at, maibe ema ne’ebe defisiente nia neon la a’at, tanba ne’e tenki kria sistema ne’ebe diak hodi tau matan ba ami, ne’ebe Kandidatu Prezidenti sira hato’o ona iha sira nia kampaña.