Situasaun Kapital Dili La’o Normal Depois de Eleisaun

Image:fairtradefilms.com.au

Notisia Husi TVTL
Tersa Kalan, 17 Abril 2012

Rejultadu Eleisaun La-Influensia Situasaun Iha Kapital Dili

“Situasaun Kapital Dili La’o Normal Tamba Povu Hakarak Paz No Estabilidade”

Situasaun Aktual iha kapital Dili oras ne’e la’o normal no la fo influensia ba rejultadu eleisaun Prezidensial.

Observasaun Jornalista TVTL iha kapital Dili hare, situasaun em jeral iha kapital Dili la’o normal hanesan bai-bain, la-iha influensia ho eleisaun Prezidensial.

Loza iha kapital Dili loke hanesan baibain hodi hala’o sira nia negosiu no negosiante sira tama-sai iha loza hodi hola sira nia sasan. Atu reforsa informasaun ne’e, komandante PNTL Distritu Dili, Superintendenti, Xefe Pedro Belo, hato’o ba jornalista TVTL katak, negosiante sira bele hala’o sira nia negosiu tamba situasaun iha kapital Dili kontroladu.

Maske situasaun la’o normal maibe Pedro Belo hateten, Polisia preparadu iha kualker oras hodi fo apoiu ba problemas ne’ebe de’it maka akontese iha Dili laran.

“Oras ne’e dadaun Polisia sira siaga satu, ami seidauk retira, membru hotu-hotu siaga satu ba eskuadra ida-idak nian, sei kontinua halo patrulhiamentu loron no kalan,” deklara Pedro Belo.

Eleisaun Prezidensial hanesan festa demokrasia ne’ebe kada tinan 5 povu sira tenki hili sira nia Prezidenti, tamba ne’e la’os buat foun ida hodi hatauk povu sira, maibe importante maka unidade nasional ba dezenvolvimentu povu iha nasaun foun ida ne’e.