Deputadus CNRT Falta Semana 3 Halo Lei Barak Ameasa Kaduka

Image: timorhauniandoben.blogspot.com

Jornal INDEPENDENTE
Tersa, 08 Maiu 2012

“Deputadu Faltozu, Lei Barak Iha PN Ameasa Kaduka”

Lei barak ne’ebe tama ona meza Parlamentu Nasional (PN) ameasa kaduka (debate fila-fali iha Lezislasaun foun), tanba Deputadus barak mak faltozu iha Plenaria PN.

Lei ne’ebe oras ne’e dadaun sei pendente hela iha PN, mak hanesan, Lei rai nian ne’ebe Prezidenti Repúblika veta iha fulan kotuk liu bá, Lei Anti Korupsaun, Lei reparasaun vitima no seluk tan.

Membru komisaun A Parlamentu Nasional, asuntu Lejislasaun, Poder Lokal no Konstituisaun, Deputadu Rui Menezes, hateten, situasaun ne’e mosu tanba ukun nain, liu-liu Parlamentu Nasional, lá hatudu vontade diak hodi defende interese nasional.

Deputadu husi bloku AMP, bankada PD ne’e dehan, hafoin eleisaun Prezidensial, servisu iha uma fukun PN, liu-liu prezensa Deputadus sira kuaze loro-loron lá prienxe korum.

“Lei sira ne’e tenki kaduka, tanba defisil atu deskute no aprova kuandu laiha kuorum,” tenik nia iha Uma Fukun PN (07/05).

Nia dehan, ameasa bo’ot liu bá Lei rai nian, tanba hafoin Prezidenti Repúblika veta fo prazu loron 40 deit bá Parlamentu Nasional atu hadia artigu balun ne’ebe Xefe Estadu kestiaona, se lae, Lei ne’e sei kaduka, bá lezislasaun foun mai mak debate fali artigu hodi aprezenta bá Prezidenti Repúblika foun.

“Mania Politika mak hanesan ne’e, Partidu sira haree liu bá interese Partidaria, interese povu nian tau bá rai,” lamenta Rui.

Iha fatin hanesan, Prezidenti PN Fernando Lasama, husu bá Deputadus sira atu kumpri nia misaun ho diak.

Nia hatutan, atu halo debate no aprovasaun Lei rai, Deputadu sira ne’ebe marka prezensa, minimu tenki hetan metade husi total Deputadu PN, kuaze 33 Deputadus.