FRETILIN - CNRT Komunika Diak Ho PD Hare Situasaun Politika

Jornal INDEPENDENTE
Tersa, 08 Maiu 2012

“CNRT-FRETILIN Hahu Komunika Di’ak Ho PD”

Partidu Demokratiku (PD) pronto nafatin hodi hamutuk ho partidus politiku seluk, liu-liu partidu bo’ot hanesan FRETILIN ho CNRT hodi kaer ukun iha periodu 2012-2017.

Pozisaun ne’e PD foti bazeia bá informasaun formal no informal husi Partidu FRETILIN no CNRT bá lideransa PD nian kona bá lalaok Governu iha futuru.

Vise Prezidenti PD, Adriano do Nascimento, hateten, oras ne’e Partidu FRETILIN ho CNRT iha komunikasaun diak ho PD, relasiona ho eleisaun Parlamentar ne’ebe besik dadaun.

Nia dehan, iha komunikasaun laran Partidu ida-idak hatudu ninia vontade no sinal pozitivu atu hamutuk hari’i Governu.

“Ami iha komunikasaun diak ho Partidu FRETILIN no CNRT atu hare’e situasaun politika, tanba ho 26 Partidus, defisil atu Partidu ida manan absoluta hodi ukun,” deklara Adriano bá INDEPENDENTE horsehik iha PN.

Nune’e mos nia dehan, kuaze Partidu hotu liu-liu FRETILIN no CNRT inklui PD rasik sei hala’o koligasaun hafoin eleisaun, tamba PD rasik hakarak hare nia forsa hetan kadeira hira iha eleisaun hodi halo koligasaun bá kaer Governu.