FRETILIN Hakruk Ba Vontade Popular Ho Pas no Estabilidade

Image: FRETILIN

Notisia Husi TVTL
Tersa Kalan, 23 Abril 2012

FRETILIN Hakruk Ba Desizaun Povu Nian Ho Pas no Estabilidade

“PSD no PD Husu TMR Atu Kumpri No Implementa Programa Ne’ebe Komprementa Iha Tempu Kampaña”

Liu husi plenaria Parlamentu Nasional ne’ebe hala’o iha Parlamentu Nasional, deputadu husi Bancada FRETILIN hato’o apresiasaun ba eleisaun segunda volta.

Iha oportunidade ne’e Francisco Branco husi Bancada FRETILIN hateten, maske sira rasik detekta no simu informasaun katak, mosu iregularidade balun durante periode eleitoral maibe nu’udar nasaun demokrasia sira simu no hakruk ba iha rejultadu eleisaun.

“Rejultadu sai tiha ona, ne’e desijaun povu nian, ami hakruk ba vontade popular, maske iha informasaun money politika maibe ami hakarak ultrapasa situasaun ida ne’e ho pas no estabilidade,” dehan Branco.

Ba kestaun ne’e, vise Prezidenti Parlamentu Nasional Vicente Guterres, wainhira preside plenaria parantia deputadus hateten, aliende kongratula Kandidatu Prezidenti Taur Matan Ruak ne’ebe manan iha eleisaun Prezidensial segunda volta, Vise Prezidenti Parlamentu Nasíonal ne’e mos kongratula kandidatu Francisco Guterres Lú-Olo ne’ebe maske lakon maibe kontinua asegura pas no estabilidade iha pais foun ida ne’e.

Entertantu, deputadu husi PSD no PD liu husi sira nia reprejetante husu ba Taur Matan Ruak atu kumpri no implementa nia programas ne’ebe kompremete durante iha periodu kampaña.

Tuir planu Prezidenti da Republika ne’ebe eleitu Taur Matan Ruak sei simu pose iha loron restaurasaun independensia 20 de Maiu hodi troka Dr. Jose Ramos Horta atual Prezidenti da Repúblika ba periodu tinan 2007-2012.