Komunidade Fomentu II Konsidera CNRT Ho Motto BBM Ne'e Badinas Bosok Militante

Notísia Husi TVTL
Segunda Kalan, 07 Maiu 2012

Partidu Ne’ebe Koligasaun Iha AMP Fo Adeus Bá CNRT, Xanana Hamosu Moto BBM (Badinas Buka Militante)
“Komunidade Fomentu II Konsidera Konsolidasaun CNRT Ne’e Ho Motto BBM (Badinas Bosok Militante)”

Partidu CNRT hala’o konsolidasaun iha Suku Komoro, Aldeia Fomentu I no II, iha konsolidasaun ne’e, Prezidenti partidu CNRT, Xanana Gusmao, fo tomada de pose bá estrutura partidu nian antes tama bá eleisaun Parlamentar.

Konsolidasaun bá Partidu CNRT iha Domingu foin lalais iha Suku Komoro, ne’ebe partisipa husi militante no simpatizante hodi rona programa Partidu nian. Iha sorumutu ida ne’e Prezidenti Partidu CNRT, Kay Rala Xanana Gusmao, hato’o bá militante sira katak, sei esforsu atu hadia povu nia moris maske oras ne’e partidus balun ne’ebe durante ne’e hala’o koligasaun ho CNRT hodi forma Governu, hato’o “Adeus” ba CNRT, maibe, CNRT kontinua esforsu atu hakbesik a’an bá povu hodi hato’o programa wainhira hetan konfiansa husi povu.

Iha oportunidade ne’e mos Prezidenti CNRT, Kay Rala xanana Gusmao, husu bá estrutura atu hatutan moto BBM (Badinas Buka Militante) nune’e bele garante CNRT manan iha eleisaun Parlamentar mai.

“Programa ita nian lalika koalia Door-to-door, maibe ita koalia de’it BBM (Badinas Buka Militante” ida ne’e mak ita halo door-to-door, ida ne’e mak ita halo to’o iha 7 Julhu ita sei manan no kaer ukun mesak, kuandu ita ukun mesak ita sei hadia diak liu tan, ita sei tuir programa ketak ida ne’ebe sei lá dada malu e sei lá dudu malu, ita dehan halo, halo dala ida, lá halo dala ida, ida seluk sai, ida seluk tama, hau senti katak povu bele hetan benefisiu diak liu tan,” deklara Xanana Gusmao.

Iha konsolidasaun Partidu CNRT ne’e konsege mosu deskontenti komunidade Aldeia Fomentu II, tamba konsidera Komisaun Organizadora lá fo sai los motivu husi serimonia ne’ebe atu hala’o, maibe bosok hodi dehan, Primeiru Ministru Xanana Gusmao, mai atu fahe ekipamentu ne’ebe uza hodi suru rai henek.

Bá kestaun ne’e, Xanana promete bá povu iha Mota Komoro, katak, Governu sei responde bá sira nia ezizensia iha tempu besik.