Lista Kandidatu Deputadu FRETILIN Bá PN Periode 2012-2017 Sei Reprezenta Kada Distritu

Jornal INDEPENDENTE
Sesta, 04 Maiu 2012

“Lista FRETILIN Bá PN Fo Oportunidade Bá Distritu”

Eleisaun Parlamentar periodu 2012-2017, Partidu FRETILIN sei fo oportunidade bá militante sira husi distritu atu tama iha lista membru Parlamentu Nasional (PN).

Sekretariu Jeral Partidu FRETILIN, Mari Alkatiri, hateten, lista kandidatu deputadu PN husi partidu FRETILIN nian sei reprezenta kada distritu.

“Pelummenus Deputadu ida tenki mai husi Distritu ida-idak nian,” tenik nia, iha bankada FRETILIN, Uma Fukun PN, foin lalais ne’e.

Nune’e, nia dehan, deputadu FRETILIN balun ne’ebe mak oras ne’e dadaun tu’ur iha Uma Fukun, maske lá temi naran, maibe iha posiblidade balun sei tu’ur iha uma, tanba naran lá tama ona iha lista kandidatura.

“Sira ne’ebe mak iha Bankada agora, balun deit maka kontinua,” dehan Alkatiri.

Konaba preparasaun atu hasoru eleisaun Parlamentar, Alkatidi dehan, nu’udar Partidu bo’ot, FRETILIN sempre preparadu ona.