Partidu KOTA no Trabalista Forma Aliansa Demokratika Ba Eleisaun Legislative 2012

Aliansa

Notisia Husi TVTL
Tersa Kalan, 05 Maiu 2012

Preparasaun Bá Eleisaun Parlamentar 2012
“Partidu KOTA no Trabalhista Forma Aliansa Demokratika”

Partidu KOTA no Trabalhista ofisialmente asina akordu koligasaun bá eleisaun Parlamentar, aliansa ne’e mos sei nakloke koligasaun ho partidu sira seluk.

Akordu ne’ebe hala’o iha Hotel Timor, Dili, Kinta-feira foin lalais ne’e, asina direitamente husi Prezidenti Partidu Trabalista ho Partidu KOTA, Prezidenti Trabalista anunsia sira nia koligasaun hodi partisipa iha eleisaun Parlamentar.

“Ami husi aliansa demokratiku, ami hakarak eleisaun parlamentar sei sai ezemplu hodi hametin unidade nasional, maibe ami mos iha preokupasaun barak katak, ita mos hala’o ita nia eleisaun barak ona, maibe ladun transparansia, iha manipulasaun barbarak, ho ida ne’e ita aprende experensia pasadu no ita hakat bá oin atu hadia diak liu tan” dehan Prezidenti Partidu Trabalista.

Entertantu Prezidenti Partidu KOTA Manuel Tilman hateten, akordu koligasaun bá eleisaun Parlamentar ne’e bá periodu tinan 2012 to’o 2017 no mos sei lá taka dalan bá partidu seluk atu hola parte iha aliansa ne’e.

Bá kestaun ne’e, koligasaun hafoin Manuel Tilman no Angela Freitas fo sira nia apoiu bá eis kandidatu Prezidenti da Republika husi Partidu FRETILIN Francisco Guterres “Lú-Olo”.

Iha akonrdu ne’e, hahu ohin bá oin, Angela Freitas sei asumi kargu hanesan Sekretariu Geral no Manuel Tilman sai hanesan Prezidenti bá Aliansa Demokratika.