Deputadu Manuel Tilman ne’ebe Kandidatu mo’os ba Prezidenti Republika ba periode 2012-2017 ne’e konsidera CNE hala’o abuza de poder.

Photo: paginaglobal.blogspot.com

Trava Osan Parpol
Kota Amesa Lori CNE ba TR

Diario (28/02/12)

Prezidenti Partidu Klibur Oan Timor Asswa’in (KOTA), Manuel Tilman ameasa, sei lori Comisaun Nasional ba Eleisaun (CNE) ba Tribunal Rekursu (TR), tanba konsidera CNE trava osan partidu politiku sira nian.

Deputadu Manuel Tilman hatutan katak, Parlamentu aprova tiha ona osan ba 2012 iha fulan Dezembru atu jere iha fulan 12 nia laran. Siknifika ezekusaun la’o iha fulan Janeiru la’os tama on aba fulan Marsu parpol sira seidauk simu osan atu halo aktividade.

“Ita atu tama ona fulan Marsu, maibe CNE sei trava hela osan ba partidus politkus, baze de demokrasia tuir Konstituisaun iha rai ida ne’e mak partidus politikus la’os CNE,” dehan Prezidenti Partidu KOTA, Manuel Tilman iha deklarasaun politika iha plenaria PN Segunda (27/02/2012)

Deputadu Manuel Tilman ne’ebe Kandidatu mo’os ba Prezidenti Republika ba periode 2012-2017 ne’e konsidera CNE hala’o abuza de poder.

“Ami hare katak, ida be trava hela osan ne’e abuza de poder, mal interpretasaun da lei, ami hein katak to’o Sesta (02/3), ami sei hatama procesu ba Tribunal de Rekursu atu kondena CNE, transferensia imidiata da subvensaun ba parpol nudar lei haruka,” Prezidenti KOTA ne hateten.

Tuir deputadu Manuel Tilman, CNE ne’e instituisaun atu garante igualdade de oportunidade, transparensia ba eleisoens laos atu jere parpol.