CNE Aponta kontra Kandidatu kontra Regras. "Faustino Cardozo: Kandidatu 2 Kontra Regras"

Image: unidadefrente.blogspot.com

Jornal Timor Post  
Sesta-feira, 02 Marsu 2012

“Faustino Cardozo: Kandidatu 2 Kontra Regras”

Prezidenti Comisaun Nacional da Eleisoens (CNE), Faustinho Cardozo informa, iha loron dahuluk, kampaña Kandidatu Prezidenti Republika (KAPREZ), iha kandidatu hamutuk nain rua mak CNE Aponta kontra regras.

Kandidatu hirak ne’e mak hanesan, Taur Matan Ruak no Lucas da Costa. Faustino informa liha hirak ne’e ba Timor Post iha nia servisu fatin, CNE, Qunital Boot, Dili.

Faustino esplika, KAPREZ Taur kontra regras primeiru, tanba nia apoiantes uza fali bandeira FRETILIN iha kampania ne’ebe tuir lolos labele, tanba FRETILIN iha nia kandidatu rasik, maka Francisco Guterres Lu-Olo.

Segundu, iha kampania dahuluk iha Liquica tuir loloos Kapres Ramos Horta mak iha parte dadersan, maibe dadersan ne’e emblema Taur ba taka uluk ona iha Liquisa.

KAPREZ Lucas, Faustino haktuir katak, kontra regras, tanba, tuir lolos ba kampaña dahuluk iha Oecuse iha parte lokraik tuku hat (4), maibe tuku rua deit kampaña ona no muda kedas ba Bobonaro.

Faustinho hateten, CNE mos aponta ona iha violasaun ne’ebe kandidatu Taur nian, apoiante sira uza simbolu Estatua Nosa senhora no Kruz tula iha kareta.

Nia hatutan, CNE mos aponta iha kareta balun ne’ebe kandidatu sira uza ba kampaña la ho sapa matrikula.

“Hau komunika ona polisia atu tau atensaun ba kestaun hirak ne’e,” informa Faustino.

Tanba ne’e, Prezidenti CNE husu ba KAPREZ sira hotu atu kuidadu ho regras ne’ebe iha no liliu apela ba apoiantes sira atu labele provoka situasaun.