Preparasaun Ba Kampaña PR , “LÚ-OLO”: Lalika Lori Violensia Ho Ameasa Malu Hodi Sai Prezidenti Ba Povu Tomak Nian”

Notisia Husi TVTL
Kinta kalan, 01 Fevereiru 2012

Preparasaun Ba Kampaña PR
“Dr. Francisco Guterres “LÚ-OLO”: Lalika Lori Violensia Ho Ameasa Malu, Husik Povu Maka Hili, Tetu No Vota, Hodi Sai Prezidenti Ba Povu Tomak Nian”

Kandidatu Prezidenti Republika Francisco Guterres “Lú-Olo” ba segundu dia aktividade kampaña Prezidensial hala’o iha Distritu Viqueque Kinta-feira (01/03) semana ne’e, maske nune’e, tuir kandidatu ho sorteiu No. 3 ne’e katak, nia (Lú-Olo) delega Sekretariu Jeral Partidu FRETILIN, Dr. Mari Alkatiri hodi kontinua hala’o atividade kampaña iha distritu Viqueque.
 
Tuir orariu iha Kinta-feira semana ne’e, kandidatu Prezidenti Republika ho nomeru sorteiu 3 Francisco Guterres “Lú-Olo” sei hala’o aktividade kampaña iha distritu Viqueque, maibe tamba iha asuntu importante balun ne’ebe kandidatu ne’e tenki halo iha kapital Dili, entaun nia delega Sekretariu Jeral Dr. Mari Alkatiri hamutuk ho ekipa susesu hodi kontinua nia aktividade kampaña iha distritu refere hodi hato’o nia programa wainhira nia eleitu nu’udar Prezidenti Republika periodu 2012 to’o 2017.
 
“Agora hau, ohin iha programa ida ne’ebe atu hasoru malu ho Delegasaun Internasional sira, entaun hau nia programa ba oin ninian, maka ida ne’e, kampaña kontinua la’o nafatin, aban (Tersa-feira, 02/01) hau sei sai fila fali ba Manufahi para hodi hala’o fali kampaña iha Manufahi, ami iha ne’e katak, hau rasik maka sei ba halo kampaña iha Distritu Manufahi, maibe atu hatutan ba sub-Distritu, Suku to’o Aldeia, ne’e ami sei halo dor to dor ho permanente,” deklara Kandidatu PR Lú-Olo.

Kandidatu Prezidenti Republika Dr. Francisco Guterres “Lú-Olo” ho prinsipiu “Husi Povu Hakarak servi Ba Povu” apresia ho prosesu eleisaun ba parte ne’ebe hala’o iha teritoriu Timor laran tomak ho dame no paz.
 
“Hau hanoin Prosesu kampaña ida ne’e hanesan sinal ida ne’ebe hatudu katak, kandidatu hotu-hotu komprimitidu nafatin ho Paz no Estabilidade ba ita nia rain, tamba ita nia povu hakarak moris hakmatek, ida ne’e fundamnetal liu. Portantu ita lalika lori fali violensia, lori fali ameasa malu ka, lori buat ruma maka atu ba tur iha kadeira Prezidenti da Republika, ne’e labele akontese, oras ne’e dadaun Povu maka boot, povu maka deside, diak liu ita hato’o ita nia programa ba povu husik povu maka hili no tetu ida ne’ebe maka diak liu, hodi sai Prezidenti da Republika,” dehan Kandidatu PR Lú-Olo.
 
Iha sesta-feira semana ne’e kandidatu Prezidenti da Republika, Francisco Guterres Lú-Olo ho nia ekipa susesu sei aranka ba distritu Manufahi hodi hala’o nia aktividade kampania ba dala III ne’ebe sei hala’o iha loron 3 fulan Marsu, iha Merkadu manufahi, Same.