Eleisaun PR Ba Segunda Ronda. “Dr. Mari Alkatiri: Kandidatu Nain 2 Ne’e Mesak Jerasaun FRETILIN No Mesak Veteranus De’it”

Notisia Husi TVTL
Sesta Kalan, 23 Fevereiru 2012  

Prezidenti Interinu Partidu FRETILIN, Dr. Mari Alkatiri, apresia kampaña husi kandidatu Prezidensial tinan ne’e, tamba konsege orienta apoiante sira hala’o prosesu eleisaun ho pasifika.

Prezidenti interinu Partidu FRETILIN, Dr. Mari Alkatiri iha Sede Comite Central da FRETILIN (CCF), Comoro, Dili, hato’o asuntu ne’e, relasiona ho susesu kampaña eleisaun Prezidensial ba periodu tinan 2012-2017.

Dr. Mari Alkatiri hateten katak, kandidatu nain 2 (Lú-Olo No Taur) ne’ebe tama ba segunda Volta mesak jerasaun FRETILIN no Veteranus nain de’it, tamba ne’e, tuir Dr. Mari Alkatiri hateten katak, ida ne’ebe de’it maka eleitu, iha objetivu atu hadia povu nia moris no hametin pas no estabilidade iha pais ida ne’e.

“Pela Primeira ves maka kandidatu 2 ne’e hotu mai husi Jerasaun FRETILIN no rejistensia ida ne’ebe ke naruk durante tinan 24 terus hamutuk ho povu, maibe povu ida ne’e sempre hili ida entre sira nain rua, tamba prosesu ne’e la’os manan ou lakon, maibe prosesu ida ne’e sei lori povu tomak atu manan, so ke, kadeira Prezidenti ne’e iha ida de’it, la’os rua, entaun ida maka tenki manan, izemplu uluk hau mos iha governu, agora hau la ukun maibe sempre fo kontribuisaun nafatin para hametin pas no estabilidade ba rai ida ne’e, e hau fiar Sr. Taur Matan Ruak iha papel ida importante atu fo kontribuisaun, tantu se de’it maka aban bain rua atu ukun rai ida ne’e tenki hametin pas no estabildiade ba povu no rai ida ne’e,” dehan Mari Alkatiri.

Dr. Mari Alkatiri informa tan katak, kandidatus ne’ebe manan ba eleisaun segunda ronda sei servisu hamutuk ho kandidatu sira seluk hodi kontribui ba dezenvolvimentu nasional iha futuru.