Eleisaun Segunda Ronda PR Sei Monu Iha 16 Abril. “PR Horta Husu PN Muda Lei Eleitoral”

Jornal Timor Post
Sesta, 23 Marsu 2012


Prezidenti Republika (PR), Dr. Jóse Ramos Horta husu ba Parlamentu Nasional (PN) atu muda lei eleitoral molok eleisaun segunda ronda tamba difikulta ema la tuir eleisaun.

“Hau nia preokupasaun kona ba lei eleitoral ne’ebe difikulta ba povu atu ba vota, hau koalia ona ho partidu balun no Prezidenti Parlamentu Nasional para hare muda tiha lei eleitoral antes Segunda volta,” Horta dehan ba Jornalista sira iha nia kna’ar fatin, Bairo-Pite, Kinta (22/03).

Iha okaziaun ne’e, Xefe Estadu Ramos Horta apela sai katak, eleisaun segunda ronda sei hahu iha 16 Abril tinan nee, nia informa kampaña hala’o durante loron 15 (Hahu 30 Marsu-13 Abril 2012).

Ba kestaun ne’e, reprejetante povu iha uma fukun Parlamentu Nasional, Tersa (20/03), kontinua fo’o atensaun ba artigu 40, lei eleitoral ne’ebe hateten, eleitor sira tenki vota tuir ida-idak nia suku, lei refere la kondis ho situasaun no kondisaun ne’ebe mak eziste iha nasaun Timor-Leste.