STAE La Kopera Ho CNE

Jornal Timor Post
Sesta, 23 Marsu 2012


Prezidenti Comisaun Nasional Eleisaun (CNE), Faustino Cardozo konfesa katak, durante apuramentu nasional, Sekretariadu Tekniku Administrasaun Eleitoral (STAE) la hatudu sentidu responsablidade hodi koopera ho CNE, tanba ne’e, ikus mai buat barak mak sala.

 
Faustinho hateten, tuir lolos orgaun eleitoral rua (STAE ho CNE) tenke servisu hamutuk, maibe STAE ninia prezensa iha fatin apuramentu nasional la masimu.

“Ami lamenta tamba prezensa STAE nian iha fatin la masimu, lori tia material sira ne’e mai, latan iha ne’e maibe nein ida mai marka prezensa,” nia hateten ba jornalista sira iha fatin apuramentu nasional, Kinta (22/03), hafoin ofisialmente publika rejultadu final eleisaun prezidensial.

Faustinho haktuir, STAE atu mosu deit ba mos, CNE mak tenke telefone tun sa’e hodi husu ba sira atu marka prejensa.

Nia dehan, failansu barak hahu kedas husi sistema eleitoral ne’e rasik, ne’ebe hasusar ema atu ba vota, failansu sira ne’e akontese, tamba obriga ema ida-idak tenki ba vota iha ida-idak nia suku.

Aliende ne’e, tuir nia, kestaun seluk maka kapasidade fiskais eleitoral sira, tamba CNE nia observasaun ba akta husi fatin votasaun sira hatudu katak, numeru ne’ebe hakerek iha ne’eba la han malu, tanba ne’e mak iha failansu deskripansia numerika.

“Dala barak ami hetan akta sira ne’e buradu tun sa’e, angka sira ne’e coret tun sa’e, no apaga tun sa’e, ne’e duni halo ami susar atu lee,” nia haktuir.