Apoiante Taur Matan Ruak Viola Lei Eleitoral

Image:Dave Lumenta (www.flickriver.com/photos/dlumenta/)

Notisia Husi TVTL
Kinta kalan, 01 Fevereiru 2012

Kampaña PR Viola Lei Eleitoral
“Faustino Cardozo: Apoiante Taur Matan Ruak Uza Simbolo Nosa Senora,Uza Kareta Governu no Kareta PN Inklui Membru Governu Partisipa Iha Kampaña, Ne’e Kontra Lei Eleitoral”

Prezidenti Comisaun da Eleisoens (CNE) Faustino Cardozo afirma, Primeiru aktividade kampaña Prezidenti da Republika mosu violasaun aktu eleitoral husi kandidatu Prezidenti Taur Matan Ruak.

Faustino Cardozo hateten, krime eleitoral ne’e hatudu liu husi uza Atributu Relizosu no iha envolvementu deretamente husi funsionarius Publiku.

Comisaun Nasiona da Eleisoens (CNE) durante hala’o fiskalizasaun ba primeira Kampania Prezidensial ne’ebe hala’o iha teritoriu Timor-Leste, konsege identifika aktu violensia balun ne’ebe sai hanesan krime eleitoral, Prezidenti CNE hateten, violasaun ne’ebe akontese iha Primeira kampaña ne’e, hanesan iha kandidatu Prezidenti Republika Taur Matan Ruak ne’ebe Uza Simbolu Reliziosa Nian ba kampaña, provokasaun husi militante husi kandidatu Prezidensial no mos involvimentu husi funsionarius publiku iha kampania Prezidensial.

“Iha violasaun regras eleitoral balun maka ami aponta, pur izempu, kandidatu Prezidenti Republika Taur Matan Ruak ninia apoiante sira, Uza Simbolu Nossa Senora, tula iha kareta kamoneta hodi hakerek vota
ba nomoro 2, Taur Matan Ruak, depois, nune’e mos uza Kruz Boot hodi hasa’e iha kareta Kamoneta, kamoneta ne’e rasik mos la tau plata, i CNE e hau rasik hetan ida ne’e, hau informa kedas ba komondante PNTL Distritu Dili ninian atu hodi hola medidas, maibe situasaun ne’e sira la konsege detekta i kontinua kalan ne’e mos hau sei hetan. Nune’e mos Funsionariu balun ba tuir kampaña, pur izemplu ba hamulak ba kandidatu Taur Matan Ruak ninian, ami lahatene funsionarius sira ne’e hetan ona lisensa ka la’e, e ami mos aponta iha parte Lospalos nian, iha funsinariu balun ba tuir kampania, ne’e ema hotu hatene no informa
mai, tamba ne’e maka ami husu ba komisaun Funsaun Publika, se karik iha lisensa husu atu informa mos ba CNE hodi nune’e CNE mos bele hatene, nune’e mos balun uza kareta estadu ninian ho Plata Governu no mos Plata Parlamentu Nasional ninian ne’ebe ba tuir kandidati PR Taur Matan Ruak ninian, ida ne’e maka ami husu PNTL atu bele hare didiak i hola medidas tuir buat ne’ebe maka lei hatu’ur” deklara Prezidenti CNE Faustino Cardozo.

Iha oportunidade ne’e, Prezidenti CNE mos husu ba kandidatu Prezidenti Republika atu kumpri kalendariu ne’ebe intrega ona ba iha Comisaun Nasional Eleisoens (CNE) hodi hala’o kampaña Prezidensial.

“Ba kandidatu sira ne’ebe maka la halo aktividade kampaña, tamba de’it osan laiha, ne’e la’os asuntu CNE ninian, la’os sai preokupasaun CNE, se maka aprejenta nudar kandidatu konserteza nia mos tenki hatene
katak, pronto mos atu hala’o aktividade kampaña, tamba kampaña ne’e rekejitus atu bele esklarese ba povu, saida maka nia atu hala’o, programa saida maka hala’o, politika saida maka nia sei hala’o, karik
eleitu nudar Prezidenti,” dehan Faustino Cardozo.

Comisaun Nasional Eleisoens husu mos ba Polisia Nasional Timor Leste atu kontinua hala’o kooperasaun ho CNE hodi garantia Paz no Estabilidade durante prosesu eleisaun Prezidensial.