Kandidatu PR Balun Halo Ameasa. “PR Horta: Prosesu Luta Ba Ukun Aan Ema Hotu Nia Kontribuisaun, La’os Sira Kaer Kilat De’it”

Image: cbc.ca

Notisia Husi TVTL
Kuarta Kalan, 21 Fevereiru 2012
 
Prezidenti da Republika Jose Ramos Horta husu ba kandidatu nain rua ne’ebe tama iha segunda ronde, labele halo ameasa hodi hetan votus. Wainhira kandidatu ne’ebe manan uza violensia no ameasa bele estraga imazen Timor-Leste nian iha mundu Internasional.

Prezidenti da Republika Jose Ramos Horta hato’o asuntu ne’e iha palasio Prezidenti hafoin hasoru malu ho obsevadores husi nasaun neebe kolaia lian portugues, Prezidenti da Republika Jose Ramos Horta mos hateten katak, kandidatu ne’ebe halo ameasa no mos buka votus liu husi violensia sei estraga Timor Leste nia naran iha mundo Internasional, tamba ne’e nia husu ba kanidatu nain rua ne’e, labele ameasa malu iha kampania segunda ronde hodi hetan votus.

“I depois sai Prezidenti tamba ameasa, nia naran foer los iha mundu internasional, e hau sei la kolabora, hau la fo apoiu, hau simu tamba nia Prezidenti, mais lalika konta ho hau atu kolabora ho nia iha futuru,” dehan Prezidenti Horta.

Prezidenti Horta mos husu ba populasaun sira, labele tauk no paniku, tamba Maijor Jeneral Lere Anan Timur no Jeneral Felomeno Paixao prntu fo seguransa hodi defende soberanis rai ida ne’e.

“Husu ba populasaun labele paniku, lalika tauk, hau koalia ho Maijor Jeneral Lere, Maijor Jeneral Lere halo ona avizu ba komando tomak, komodante sira hotu-hotu, hau fiar Maijor jeneral Lere nia mak ohin loron ka’er Forsa Armadas, laiha ema seluk tan, e nia mos hateten, kualker elementus Forsa armadas tama iha politika, liliu partisipa iha kampania, ne’e violasaun lei e violasaun regulamentu disiplinar militar, hau koalia mos Jeneral Felomeno Paixao nia mos hateten ida ne’e, ke sira nain rua e komando tomak lakohi Forsa armadas atu halo interfrensia, ne’e duni povu lalika tauk, komando Porsa armada e komando Polisia mak mantein sira nia netralidade, lalika tauk tamba laiha ema ida ke bele sobu nasaun ne’e,” deklara Prezidenti Horta.

Iha parte seluk, Prezidenti ne’e haktuir katak, nia sei tetu fo votus ba kandidatu ne’ebe la halo ameasa hodi hetan votus, maibe ida ne’ebe mak manan nia sei respeita nu’udar Prezidenti da Republika Timor-Leste nian.

“Ita bot sira nia deskursu, labele hanesan halo ameasa oioin, ita hotu-hotu hatene, ita hotu-hotu kontribui ba luta ne’e mak nasaun ne’e hetan independensia, la’os de’it sira be ka’er kilat, igreija nia kontribuisaun maka’as los, padre sira nian, Frente Klandestina, Frenti Diplomatika, tamba Frente Dilomatika maka INTERFET mai iha ne’e (1999), ne’e duni tenki hare buat sira ne’e hotu, laiha ema ida ke bele hateten, tamba ami maka manan, ami mak halo funu, la’e, ita hotu-hotu kontribui, tantu deskursu tenki kuidadu, ne’e para povu la tauk, tamba agora ita rona ona povu balun tauk, komesa prepara sira nia hahan, komesa prepara sira nia batar hut, sira nia akar, atu halai ba foho, tamba saida mak sira halo ida ne’e? tamba kampania balun ameasa, katak ami la manan imi sei hare took, SMS balun, telefone balun, ba elementus kandidaturas,” deklara Horta ho tristeza.

Maske iha rumoris no informasaun oi-oin iha komunidade nia leet katak, iha eleisaun segunda ronde sei mosu konflitu ou krizi, maibe Timor Oan hotu iha hanoin ida de’it maka hati’i dame ho Paz iha rai ida ne’e.

Kandidatu Prezidenti Republika Francisco Guterres Lu-Olo no Taur Matan Ruak mos iha objetivu ida de’it, maka povu Timor-Leste bele moris diak iha futuru.