Kandidatu PR Lu-Olo Tama Ba Segunda Ronde “Bloku Proklamador Husu Ba Simpatizante, Militante Hodi Fo Apoiu Kandidatu Lú-Olo”

Notisia Husi TVTL
Kuarta Kalan, 21 Fevereiru 2012

Bloku Proklamador Francisco Xavier do Amaral deklara, fo apoiu bakandidatu Prezidenti da Republika Francisco Guterres Lú-Olo ba segunda ronda.

Deklarasaun ne’e, bajeia ba enkontru konjunta entre Bloku Proklamador no Prezidenti interinu FRETILIN, Mari Alkatiri. 

Delegasaun ne’ebe kompostu husi Sekretariu Jeral Bloku Proklamador Arlindo Marcal no Porta Vos Hermengildo Lopes Kupa, Prezidenti PDRT Gabriel Fernandes ho Prezidenti PARENTIL Faviano Pereira Lopes, kuarta-feira ne’e hasoru malu ho Prezidenti interinu no Sekretariu Jeral FRETILIN Mari Alkatiri iha CCF Komoro, Dili, hodi koalia kona ba sira nia apoiu ba kandidatu Prezidenti Republika Francisco Guterres Lú-olo.

Iha konferensia da imprensa, Mari Alktiri hateten, Partidu FRETILIN konsidera partidu bot no kiik ne’ebe hakarak halo koligasaun, tamba partidu hotu iha importansia.

“Ba segunda ronda, para labele halo hanesan projetural, ita tenki iha kapasidade halo aliansa ida ke iha natureza ho planu no estratejiku, partidu kiik ka bot iha importansia atu haida rai no povu liu husi dalan demokrasia hodi hametin Paz no estabilidade,” deklara Mari Alkatiri.

Iha fatin hanesan bloku proklamador esplika sira nia rajaun hodi fo apoiu kandidatu Lú-Olo hodi konkore iha eleisaun ba segunda ronde.

“Ami hakarak esplika katak, tamba sa maka fo apoiu ba kandidatu mai husi partidu FRETILIN, primeiru, ami hare katak, tamba ita nia Matebian Francisco Xavier mos Primeiru Prezidenti partidu FRETILIN no liu husi dalan FRETILIN maka deklara proklamasaun ba independensia, segundu, tamba maske Camarada Lú-Olo kandidatu husi partidu FRETILIN maibe nia sei sai Prezidenti ba Povu Timor-Leste tomak,” deklara lideransa Bloku Proklamador.

Lideransa Bloku Proklamador ne’e mos apela ba nia militante tomak atu fo apoiu ba kandidatu Prezidenti Francisco Guterres Lú-Olo.