Prezidenti CNE Husu RTTL-EP Fo Tratamentu Hanesan Ba Kandidatu PR

Notisia Husi TVTL  
Kinta kalan, 01 Fevereiru 2012

Prezidenti CNE Husu RTTL-EP Fo Tratamentu Hanesan Ba Kandidatu PR  

“Lasama Lamenta Kampaña PR Iha Primeiru Dia, Tamba La Asesu Informasaun Husi RTTL-EP”

Prezidenti CNE Faustino Cardozo husu ba instituisaun Radio Televizaun Timor-Leste (RTTL) atu fo tratamentu hanesan ba kandidatu Prezidensial, wainhira halo publikasaun notisia konaba kampaña Prezidensial.


Preokupasaun ne’e hato’o husi Prezidenti CNE Faustino Cardozo, relasiona ho lamentasaun husi kandidatu Prezidenti balun, ne’ebe la satisfas ho publikasaun nuticia TRL-EP nian kona ba kampania kandidatu Prezidensial.

Prezidenti CNE Faustino Cardozo husu ba RTTL-EP atu hala’o tratamentu igualidade ba kandidatu 13, wainhira atu hato’o informasaun ba publiku.

“Kandidatu PR sira mos telefone mai CNE, dehan katak, tamba sa maka ami nia iha Lospalos, iha Baucau la halo kobertura, maibe wekuse ida dook ne’e bele halo kobertura, nebee sira senti la dun furak, tamba ne’e maka ami husu ba RTTL-EP atu halo tratamentu didiak i fo igulaidade oportunidade ne’e hanesan ba kandidatu sira hotu, ami hatene iha kandidatu hat maka horikalan, liu husi Telejornal, sira nia aktividade la fo sai, ida ne’e maka ohin dadersan kandidatu sira ne’e, Sr. Fernando Lasama telefone mai ami (CNE) hodi hato’o nia lamentasaun no mos kandidatu sira seluk telefone sira nia lamentasaun,” dehan Faustino Cardozo.

Hatan ba preokupasaun CNE, Prezidenti Consellhu Administrasaun RTTL-EP Espedito Dias Ximenes rekoinese RTTL-EP horsehik labele fo prosionalidade ba kandidatu PR, tamba problemas tekniku.

“Kampania PR iha primeiru dia, difikuldade iha tekniku entre RTTL-EP no Timor Telekom iha kordinasaun iha terenu, maibe to’o iha ohin (Kinta-Feira) dader komesa iha ona koneksaun husi estasaun Baucau mai Kaikoli diak ona, ne’e bele rejolve ona kampaña parte Leste nia hanesan Baucau, Lospalos, Viqueque to’o iha Manatutu,” dehan Expedito Dias.

Prezidenti Konselo Administrasaun RTTL-EP mos husu ba kandidatu Prezidensial sira atu kompriende kona ba sira nia diretu ba antenna iha publikasaun Telejornal.