“Mari Alkatiri: Vota Ba Lu-Olo Para Sai Prezidenti Ba Povu Tomak”

Notisia Husi TVTL
Sabadu Kalan, 03 Marsu 2012

Ekipa Vitoria Kandidatu PR "Lu-Olo" 

“Mari Alkatiri: Vota Ba Lu-Olo Para Sai Prezidenti Ba Povu Tomak”

Kandidatu Prezidenti Republika Francisco Guterres "Lu-Olo" afirma sei limiti indultu ba prizoneiru hanesan programa prioridade ba kandidatu, wainhira hetan fiar husi povu Timor-Leste, ekipa vitoria ba kandidatu Prezidenti Francisco Guterres Lu-Olo hato’o lia hirak ne’e, wainhira hala’o atividade kampaña Prezidensial iha Distritu Viqueque Sesta-feira (02/03).

Tama ba loron 3 atividade kampaña kandidatu Prezidenti Republika Francisco Guterres "Lu-Olo", iha Distritu Viqueqeu hala’o husi nia ekipa vitoria ne’ebe xefia husi Sekretariu Jeral partidu FRETILIN Mari Alkatiri, durante kampaña Mari alkatiri hateten, kandidatu "Lu-Olo" wainhira hetan konfiansa husi povu hodi asumi kargu nudar Xefe do Estado sei limiti indultu ba prizioneirus.

“Lu-Olo sai Prezidenti da Republika sei kontinua ho konstituisaun, maibe mos sei husu ba Parlamentu Nasional atu aprova lei ida para atu marka tan istoria iha rai ida ne’e, hateke ba baliza para povu bele hatene, ema halo krimi saida mak bele fo indultu, problema Parlamentu to’o agora seidauk aprova lei ida, para atu regula prosesu sira ne’e, ne’e prioridade,” deklara Alkatiri.

Aliende ne’e, wainhira eleitu kandidatu Francisco Guterres "Lu-Olo", sei sai nu’udar Xefe do Estado ba povu tomak, la’os de’it ba Partidu.

“Tempo to’o ona, la’os importante ba governu de’it, importante Prezidenti, Governu, Parlamentu atu servisu no hateke ba kotuk, primeiru labele iha politika interven tribunal nian, husik sira halo sira nia funsaun ho independente, tamba ne’e, Vota ba "Lu-Olo", para "Lu-Olo" sai Xefe do estado, Vota ba "Lu-Olo" Para "Lu-Olo" sai Prezidenti ba Povu tomak,” deklara Mari Alkatiri.

Tuir angenda kuartu dia kampaña ekipa vitoria sei kontinua hala’o iha distritu Lautem inkuantu kandidatu Francisco Guterres "Lu-Olo" hala’o mos kampaña Prezidenti iha Distritu Manufahi.