Primeiru Dia Kampanha, Lu-Olo: Nia Kandidatu Ba PR Atu Hametin Paz No Estabilidade

Notisia Husi TVTL 
Kuarta kalan, 29 Fevereiru 2012

Primeiru Dia Kampanha Kandidatu PR 

“Dr. Francisco Guterres Lu-Olo: Nia Kandidatu Ba PR Atu Hametin Paz No Estabilidade” 

Kandidatu Prezidenti da Republika ba periodu 2012 to’o 2017 Francisco Guterres Lu-Olo sei kria estabilidade iha rai laran no respeita kompetensia orgaun soberania ida-idak nian, wainhira eleitu nu’udar Prezidenti da Republika, asuntu ne’e sai nu’udar nia kumprimisiu iha primeiru dia kampania eleitoral.

Kampanha Kandidatu Prezidenti Republika Dr. Francisco Guterres Lu-Olo Kuarta-Feira ne’e iha distritu Ermera ne’ebe hahu iha tuku 2 oras Timor-Leste iha kampo Futebol Gleno, ne’ebe antusiazmu husi militantes, simpazitantes rihun ba rihun, kampanha ho tema Hametin Paz, Unidade Hodi Garantia Soberania Timor-Leste ne’e, Kandidatu Dr. Francisco Guterres Lu-Olo promete, wainhira eleitu sei kria estabilidade iha rai laran.

“Hau nia kumprimisiu, karik hau sai Prezidentida Republika para garantia paz, estabilidade iha ita nia rai, loke dalan para atu hala’o justica ho laran moos hodi justica bele la’o iha ita nia rai,” deklara Lu-Olo.

Nune’e mos kandidatu ho numeru sorteiru 3 ne’e, sei respeita kompotente iha orgaun soberania ida-idak nian, wainhira sai Prezidenti da Republika, tamba kandidatu ne’e hakarak garante normais no funsionamentu instituisaun estadu nian, signifika katak, orgaun soberania hat ne’e ida-idak la’o tuir nia dalan.

“Hau hakarak atu sai Prezidenti da Republika para atu labele halo opozisaun ba Governu, katak Governu iha ninia kna’ar ketak, Parlamentu Nasional iha ninia kna’ar seluk ida, Prezidenti da Republika iha ninia kna’ar ida, Tribunal sira iha ninia kna’ar seluk ida, orgaun soberania hat ne’e hamrik hamutuk atu tane ita nia estadu de deitu demokratiku,” Deklara tan Lu-olo.

Kandidatu Francisco Guterres Lu-Olo antes atu kampanha halo vizita ba fatin subar no semiteriu Saudozo Konis Santana hodi kari aifunan, tuir ajenda Kampania ba Kandidatu Prezidenti Republika Dr. Francisco Guterres Lu-olo ba dala 2, sei hala’o iha dia 2 de Marsu Sesta-Feira iha Distritu Manufahi no Viqueque.