Governu AMP Destroi Estrada Timor-Leste

Image: TimorHauNiaDoben.Blogspot.Com

Jornal INDEPENDENTE 
Kinta-feira, 01 Marsu 2012

“Governu AMP Destroi Estrada Timor-Leste”

Deputadu husi bankada FRETILIN, Estanislau da Silva hateten, durante tinan ha'at (4) nia laran, Governu Aliansa Maioria Parlamentar (AMP) la-resolve problema iha teritoriu Timor-leste, maibe destrui deit, maske tinan-tinan Parlamentu Nasional aprova osan bo'ot iha area infrastrutura.

Tuir nia, durante ukun Governu AMP nian, atu resolve problema estrada iha Timor-Leste, Governu AMP uza deit programa emerjensia ne’ebe halo kualidade estrada laiha.

“Inisiativa inovadora, maibe, maibe inisiativa destroidora,” dehan nia iha uma Fukun PN horsehik, (29/01).

Estanislau dehan, estrada iha kapital Dili presiza hadia, maibe tamba sa maka estrada iha area rural mos labele hadia, purke ita nia povu barak liu moris iha area rural,” dehan Eis Primeiru Ministru, Terseiru Governu Konstitusional ne’e.

Nia dehan, bainhira FRETILIN nia ukun iha momentu ne’ebe, Partidu balun ne’ebe agora iha Governu AMP, balun dehan Governu FRETILIN hatene deit maka taka kuak, maibe, Governu AMP taka estrada kuak deit mos la hatene, halo estrada ne’e kuak ba beibeik.

“Sira (Governu AMP) halo buat hotu-hotu emerjensia ne’e kualidade laiha, ami sempre hateten, buat hotu tenki halo ho planu,” dehan deputadu FRETILIN ne’e.