“Ramos Horta Prontu Apoiu Prezidenti Republika Foun”

Image: Presidenttimorleste.tl

Notisia Husi TVTL 
Kuarta kalan, 29 Fevereiru 2012

Primeiru Dia Kampanha Kandidatu PR 

“Ramos Horta Prontu Apoiu Prezidenti Republika Foun”

Kandidatu Prezidenti da Republika, Dr. Jose Ramos Horta orgulhu ho sistema eleitoral Timor-Leste ne’ebe fo oportunidade ba ema hotu atu kandidata a'an ba Prezidenti da Republika. Ramos Horta hato’o lia hirak ne’e, wainhira hala’o nia atividades primeiru kampania Prezidensial nian iha Distritu Liquisa.

Kandidatu Prezidenti da Republika, Dr. Jose Ramos Horta hala’o Primeiru kampanha iha distritu Liquisa, parantes apoiante Horta ne’ebe kandidata a'an ba periode 2012 to’o 2017 hateten, nia orguilo ho sistema eleitoral Timor Leste ne’ebe hatudu demokratiku tamba oras ne’e kandidatu Prezidenti Republika 13 maka konkore iha eleisaun Prezidensial, iha oportunidade ne’e Ramos Horta promete, wainhira nia reeleitu nia sei servisu hamutuk ho governu hodi tau matan ba area edukasaun no saude.

“Se Kandidatu Prezidenti Republika hetan 80% votasaun, liu-liu kandidatu ne’ebe independente eleitu direitamente husi povu, povu hato’o mandatu ba nia, ne’e autoridade maka’as atu koalia ho governu, Parlamentu nasional, Komunidade internasional, atu tau matan ba povu, ba hau prioridade rua, ida, edukasaun, ida fali saude,” deklara Ramos Horta.

Maske nune’e, Ramos Horta mos hateten katak, karik nia la-eleitu ba segundu periodu, nia pronto atu fo apoiu ba kandidatu seluk ne’ebe povu hili atu sai lideransa masima iha nasaun foun ne’e.

“Kandidatu Prezidenti se maka povu hili, se povu la-hili hau, hau iha tempo barak atu tulun prezidenti foun ne’e, wainhira nia presiza hau nia tulun atu tane nia, atu akompania nia ba tasi balun, hodi presiza husu hau, eis Prezidenti favor ba Washington, ba Jakarta, lori Timor nia naran, lori asuntu sira ne’e koalia ho sira, hau sei konsidera no hau ba,” deklara Ramos Horta.

Tuir planu hafoin hala’o kampania iha distritu Liquisa ba kampanha Kandidatu prezidenti republika, ekipa susesu Jose ramos Horta sei hala’o kampanha hanesan iha distritu Viqueque.