Sekretariu Jeral (Sekjer) FRETILIN, Dr. Mari Alkatiri Kestiaona Letratu Taur Uza Farda Militar

Image: www.zimbio.com

 
Jornal Timor Post
Kinta-feira, 01 Marsu 2012

“Dr. Mari Alkatiri Kestiaona Letratu Taur Uza Farda Militar”

Sekretariu Jeral (Sekjer) FRETILIN, Dr. Mari Alkatiri kestiaona maka’as letratu kandidatu Prezidenti Republika (KAPREZ) Taur Matan Ruak ne’ebe uza nafatin farda militar.

“Hau husu ba Irmaun Taur Matan Ruak para hatan mai hau, tanba saida maka uza nafatin farda militar,” deklara Alkatiri wainhira akompania KAPREZ Francisco Guterres Lu-Olo ba hala’o kampania dahuluk iha Sub-Distritu Gleno, Distritu Ermera, Kuarta (29/02).

Alkatiri hateten, KAPREZ Taur tenki hatan ba nia kona ba kestaun ne’e, tanba nia rasik duvidas katak, se wainhira KAPREZ Taur la eleitu ba Prezidenti Republika karik bele fila-fali ba militar, tanba KAPREZ Taur hatudu dadauk iha letratu kampania uza farda militar.

Alkatiri hateten ba apoiantes KAPREZ Lu-Olo iha Gleno, Ermera katak, iha periode primeiru Presidensial, Xanana Gusmao, hanesan Xefe Estado no komandante, katak, maske sai hona husi xefe estadu maibe hakarak nafatin atu sai komandante.