Kampanha Kandidatu PR Lu-Olo Doko Gleno

Jornal Timor Post 
Kinta-feira, 01 Marsu 2012

“Kampanha Kandidatu PR Lu-Olo Doko Gleno”

Iha Estadiun Sub Distritu Gleno, Distritu Ermera, Kuarta Horsehik, kandidatu Prezidenti Republika Dr, Francisco Guterres Lu-Olo promete katak, nia sei halo tuir de’it konstituisaun haruka, ho lei, ne’ebe hala’o tuir kompetensia Estadu, respeita orgaun sira seluk.

“Hau sei la kahur hau nia kompetensia ho tribunal, hau sei la hola desizaun ba dadur sira, hau sei halo tuir deit kna’ar ne’ebe maka orgaun estadu nian,” Lu-Olo dehan.

Kona ba relasaun eksterna, Lu-olo hala’o tiha ona durante nu’udar sei kaer pasta Prezidenti Parlamentu Nasional, maibe atu hametin liu tan nasaun tomak iha reijaun, Lu-Olo sei buka dalan liu husi amigu CPLP, para buka relasaun ho nasaun Eropa, Amerika, Afrika, no seluk tan.

Kona-ba maternal infantil, kandidatu ne’e sei buka meus para hadia duni, tanba inan feton sira no labarik maka sai hanesan aliserse nasaun nian no kondena violasaun seksual ne’ebe labarik feto sira sei infrenta no trafiku umanu.

Iha kampanha ne’e, partisipa husi apoiantes liu rihun ba rihun, no kampu refere nakonu ho kor mean, tamba apoiante sira uza atributu partidu no simbolu partidu ne’ebe ho orijin kahur ho mean, apoiante sira doko duni Ermera tamba haleu Gleno Vila depois to’o iha mertutu (Ermera Lama) hodi vizita Saudozu Nino Konis Santana nia rate.