Uza Bandeira FRETILIN “Lú-Olo Lori Ba Tribunal”

Jornal Timor Post
Segunda, 12 Marsu 2012

Uza Bandeira FRETILIN
“Lú-Olo: Lori Ba Tribunal”

 
Sekretariu Jeral partidu FRETILIN, Mari Alkatiri hatete, ba kandidatu Prezidenti Republika (KAPREZ) sira ne’ebe maka uza bandeira FRETILIN hodi ba hala’o kampaña, ne’e hanesan krimi eleitoral, tamba ne’e sei ba hasoru malu iha Tribunal.

Sekjer Partidu FRETILIN Mari Alkatiri fo Viva ba KAPREZ Lú-Olo hamutuk ho militantes no apiantes iha distritu Liquisa.

Relasiona ho kandidatu Prezidenti Republika hamutuk 12, ne’ebe iha kandidatu balun uza Bandeira FRETILIN ba kampaña Prezidensial, tanba ne’e Prezidenti Partidu FRETILIN interinu atual Sekjer Partidu FRETILIN Mari Alkatiri no KAPREZ Lú-Olo promete katak, sei lori kazu ne’e ba tribunal, tanba konsidera hanesan krime eleitoral.

“Ami hatene tiha ona, kandidatu balun agora uza bandeira FRETILIN ne’e kontra regulamentu no konsidera krime eleitoral, tanba ne’e, ita tenki hasoru malu iha Tribunal,” deklara Mari Alkatiri iha kampnaia Distritu Liquisa (10/03) foin lalais ne’e.

Atual Sekretariu Partidu FRETILIN ne’e hateten, iha nasaun Timor-Leste iha partidu FRETILIN ida de’it, maka FRETILIN ida ne’ebe maka uluk lori rai Timor-Leste hetan independensia, tanba Partidu FRETILIN iha nia kandidatu rasik, mak kandidatu Lú-Olo ne’ebe sei Prezidenti ba povu tomak.

Entertantu sekjer FRETILIN Mari Alkatiri salienta mos katak nasaun Timor-Leste hafoin kaer ukun iha tinan 2002 povu hili kedas komandante Kay Rala xanana Gusmao hodi sai Prezidenti Republika no iha segundu periodu 2007 povu fo fiar ba Frente diplomata atual Presidenti republika, Jose ramos Horta, nune’e iha 2012 tempu ona ba politika ida atu kaer ukun.

Liafuan hanesan hato’o mos husi KAPREZ Lú-Olo relasiona ho kandidatu balun ne’ebe mak foin lalais iha distritu Baucau uza atributu bandeira FRETILIN ba kampaña.

“Prosesu ami hatama tiha ona ba tribunal, tanba aktus uza Bandeira FRETILIN ba sira nia kampaña, la’os uza ba kandidatu FRETILIN nian, ne’e kontra lei no krime eleitoral, tanba ne’e, ami tenki ba hasoru malu iha tribunal,” Lu-Olo reafirma.



“Agora tempo ona, atu ema politika atu ukun nasaun Timor-Leste, tanba ne’e, husu ba povu tomak atu iha 17 Marsu 2012, vota ba povu aileba nia oan, ne’ebe agora sai ona doutor no prienxe kriteriu tomak,” Alkatiri dehan.