Governu AMP La Tau Atensaun Ba Saude, Pasiente Tenki Toba Iha Koridor Sala

Image: mariestopes.org

Notisia Husi TVTL
Kuarta Kalan, 11 Abril 2012

Governu La Tau Atensaun Ba Parte Saude

“Sala Maternidade Limitadu, Pasiente Tenki Okupa Fatin Koridor”

Sala Maternidade kuaze nakonu ho pasientes ne’ebe atu partus iha Ospital Nasional Guido valadares Dili, ho limitasaun sala maternidade ne’e pasiente sira tenki okupa to’o iha fatin koridor (dalan-tama).

Tuir data ikus ne’ebe iha, hahu husi fulan Janeiru to’o mai iha fulan Abril ne’e, kada loron ida, sala maternidade tenki rejista inan ne’ebe atu partus kuaze 30 resin, tamba ne’e tenki aumenta tan kama atu fasilita inan no oan sira ne’ebe moris no tenki okupa to’o iha fatin koridor sala maternidade.

Problema sira ne’e, tuir Xefe Departementu Jenekologia, Joazina Saldanha, katak, tamba pasiente ne’ebe mai barak liu husi klinika sira iha kapital Dili inklui husi distritus ne’ebe maioria kazu partus normal.

Difikuldades ne’ebe Hospital Nasional Guído Valadares hasoru maka falta Rekursu Humanus, tamba parteira ne’ebe iha sala maternidade 16, sira tenki atende inan isin 2 ne’ebe atu partus husi Dili, inklui husi distritus, husi loron no kalan.

To’o oras ne’e fatin maternidade sei nakonu ho inan isin 2 ne’ebe atu partus no balun maka oras ne’e fila ona ba iha sira nia uma. Parteirus no mediku sira nafatin fó atendimentu ba pasientes sira ne’ebe presiza tulun, maske oras ne’e sala maternidade nakonu ho inan isin rua, maibe Hospital Nasional Guído Valadares hasoru problema iha parte lozistika.