Ró Naval Rua Sosa Husi Xina (Tinan 2011) Lá Aguenta

 Jornal INDEPENDENTE
Segunda, 23 Abril 2012

Ró Naval Iha Hera Abandonadu
“F-FDTL Husu Governu Sosa Ró Foun”

Komandante F-FDTL, Major Jeneral Lere Anan Timor, husu Governu atu sosa ró Naval foun, hodi bele kontrola peska illegal iha Kosta-Sul.

Ró Naval rua ne’ebe Governu sosa husi Xina iha tinan ida liu ba (2011) lá aguenta atu Forsa Marina halo operasaun iha tasi mane.

Aliende, kondisaun ró, portu Hera mos sai problema bo’ot ba ró fatin hitu iha neba, oras ne’e ró hirak ne’e abandonadu, tanba fatin lá iha.

Maijor Lere dehan, kuandu tasi bo’ot iha tasi mane, Marina sei labele halo operasaun, maske peska ilegal naok riku soin tasi nian ne’ebe paretensia nasaun Timor-Leste nian.

Lere mos dehan, Governu tenki sosa ró lalais, tamba peska ilegais hala’o operasaun maka’as hodi naok riku soin parte tasi-mane nian.

Lere mos haktuir tan katak, Ró lima ba F-FDTL, rua ne’ebe oferese husi estadu Portugal, tuir Lere tuan ona, tanba ne’e, sei uza deit ba treinamentu F-FDTL nian.

Ba kestaun ne’e, Rezidenti Repúblika, Jóse Ramos Horta, fo reasaun maka’as bá ró husi Xina no kondisaun porto Hera, ne’ebe oras ne’e abandona. Nia (PR-red) fo atensaun ba governu atu esplika klaru kona ba folin ró nian ho osan hamutuk Miliaun USD28, maibe labele halo operasaun iha Kosta-Sul.

Entertantu, antes ne’e mos membru Parlamentu Nasional, Deputadu Estanislau da Silva, husi Bancada FRETILIN, preokupa ho ró rua ne’ebe sosa husi Xina labele halo operasaun iha tasi-mane.

Deputadu Opozisaun FRETILIN ne’e dehan, Governu ne’ebe mak foti desizaun no kompañia Xina ne’ebe halo ró mak tenki responsabliza tanba osan ne’e estado nia osan.