Francisco Guterres Lu-Olo: Hau Sei La Halo Krize Hodi Fahe Povu TL

Jornal INDEPENDENTE  
Segunda-feira, 05 Marsu 2012

“Francisco Guterres "Lu-Olo": Hau Sei La Halo Krize Hodi Fahe Povu TL”

Kandidatu Prezidenti Republika Preiodu 2012-2017 Francisco Guterres "Lu-Olo" hatete, bainhira nia sai Prezidenti nia sei hakuak ema hotu, no la halo krize hodi fahe povu Timor-Leste hanesan krize ne’ebe akontese iha 2006.

“Hau nia kumprimisiu maka ida ne’e, ita sei lao hamutuk ho dame ho paz nia laran, Timor-Leste ho hau, hau sei la halo krize para atu povu ne’e fahe malu tan dala ida, ita tenki hadia,” dehan Lu-Olo iha nia kampanha iha Distritu Baucau, Domingu (04/03).

Kandidatu ne’ebe husi Partidu Istoriku FRETILIN ne’e dehan, sai Prezidenti nia sei garante estabilidade tuir ispiritu konstituisaun RDTL.

“Nudar Prezidenti da Republika hau hateten tan dala ida, para garante paz, estabilidade iha ita nia rain, unidade nasional, hametin soberania nasional, integridade territorial, atu hala’o povu ida ne’e nia moris diak ho hakmatek,” dehan Lu-Olo.

Lu-Olo dehan, kna’ar prezidenti Republika hateten klaru ona iha konstituisaun RDTL tanba ne’e nia halo knaar ne’ebe maka komuniga iha konstituisaun RDTL, maibe nia sei fo hanoin nafatin ba governu atu dezenvolve povu nia moris.

“Konaba saude, agrukultura hau sei la’o hamutuk ho governu hofi fo opiniaun nafatin ba governu par abele tau matan ba povu nia moris,” dehan nia.

Tanba nee, Lu-Olo dehan, atu kandidatu partidu A ka Ou B manan, povu Timor-Leste nia diretu tau ona iha konstituisaun RDTL no lei sira ne’ebe maka iha, laiha ema ida atu muda tun muda sa’e.

Relasaun Externa, Lu-Olo dehan, nia sei hametin relasaun diak ho nasaun vizinu sira iha ASEAN no Asia pasifiku inklui mos nasaun CPLP no rai sira seluk iha mundu hanesan Amerika no Eropa.

Nudar Xefe Estadu, Lu-Olo dehan, nia sei respeita Tribunal sira nia independensia, katak, parte tribunal, politika labele hatama nia kanuru tohar.