Kampanha Kandidatu PR Lu-Olo Iha Same: "Sei Hametin Unidade Nasional No Lakohi Povu Terus Tan”

Notisia Husi TVTL  
Sabadu Kalan, 03 Marsu 2012

Kampanha Kandidatu PR Lu-Olo Iha Same“Francisco Guterres "Lu-Olo": Sei Hametin Unidade Nasional No Lakohi Povu Terus Tan”

 
Kandidatu PreZidenti Francisco Guterres Lu-Olo sei respeita konstituisaun RDTL no garante unidade nasional, promesa ne’e hanesan promesa programa perioridade, wainhira nia eleitu nu’udar Prezidenti da Republika ba periodu 2012 to’o 2017.

Kampanha kandidatu Francisco Guterres Lu-olo ba dala hat(4) iha distritu Manufahi simu ho haksolok hodi simu ho lisan tuir lisan Manufahi nian.

Antes ne’e, kandidatu "Lu-Olo" akompania husi nia eleitores hodi hala’o komfoi husi Suku Gola-Rua ba Eis Merkadu Manufahi, perante nia eleitores, Lu-Olo hateten, wainhira hetan fiar husi povu, nia sei Garante Unidade Nasional hodi la husik tan povu no nasaun ne’e atravesa krize ba dala rua(2).

“Nu’udar Xefe ba estadu para atu garante unidade nasional iha ita nian rain, unidade ida ne’ebe la-iha Loromonu e la-iha mos Lorosa’e, ida ne’e maka hau hakarak atu garante, Unidade ida ne’ebe, respeita mos ema husi partidu sira seluk, hau (Lu-Olo) sei la halo krizi ba rai ida ne’e no povu ida ne’e, tamba, hau lakohi hau nia povu ida ne’e terus fila fali iha rai ida ne’e,” deklara Lu-olo.

Lu-Olo mos hatutan, nia sei respeita konstituisaun RDTL, nu’udar lei inan no matan dalan ba futuru povu no nasaun ida ne’e.

“Hau kandidatu ba Prezidenti da Republika, hau sei kumpri nafatin ba ita nia konstituisaun, tamba sa?, tamba ema balun hanoin katak, hau sae ba prezidenti, atu sobu, lei mos tenki muda, konstituisaun mos tenki muda, ema mos tenki muda hotu, ema balun hateten hanesan ne’e, maibe hau dehan, bainhira ita bot eleitu sai Prezidenti republika ita bot sei jura ba konstituisaun ida ne’e para atu kumpri, halo nusa maka ita bot jura tiha ba konstituisaun ida, sa’e, ita bot kontra fila fali konstituisaun? Prezidenti Republika nia kna’ar la’os atu ba halo lei, Prezidenti nia kna’ar ne’e oin seluk ida,” deklara Lu-Olo.

Kampanha ne’e la’o ho susesu tamba hetan apoiu antusiazmu husi nia eleitores no hetan seguransa husi membru PNTL.